Fríða

UFO

2012-02-26T15:27:00.001Z

Það er svo gaman að finna eitthvað sem er óklárað og taka það aftur upp eins og þetta hérna,

ég fann þetta í poka bak við hurð í saumaherberginu mínu.

og seinna meir verður þetta eitthvað í þessa áttina - allavega er til nóg af afgöngum.

Super Mario quilt

2012-01-07T17:17:00.002Z

Loksins er ég að sjá fyrir endan á þessu verki - aðeins eftir að setja kant utanum og láta stinga verkið.

Jólaföndur

2011-12-17T09:33:00.001Z

Heklaðar gardínur

2011-12-10T10:56:00.001Z

Gardínurnar sem ég var að hekla handa systur eru komnar upp hjá henni í bústaðnum

Nú mega jólin koma fyrir mér

2011-12-04T16:39:00.001Z

Sum verkefni taka lengri tíma en önnur en klárast samt - núna fyrir jólin tók ég mig til og "setti upp" eins og það hét í den, jóladúkinn minn sem er búin að vera í vinnslu síðan 2008 - ég kláraði að sauma hann fyrir jólin í fyrra - núna er hann klár undir jólatré

Jóladúkur fyrir dótturina

2011-11-30T20:32:00.001Z

Ákvað að sauma þennan fallega dúk fyrir Guðný Maríu á skennkinn hennar - vonandi kemur hann vel út hjá henni

Ýmislegt í vinnslu og annað klárað

2011-11-28T18:46:00.001Z

Það er svo gott að hafa margt að grípa í, hver kannast ekki við það

ég stóðst ekki mátið og keypti þetta undurmjúka babyalpaca garn í Litlu Prjónabúðinni um daginn og þessa uppskrirft af barnaskokk

ég kláraði nú gardínuna mína um daginn, en systir bað um eina fyrir sig í eldhúsgluggann í bústaðinn þannig að það var slegið upp á einni til viðbótar og hún er núna tilbúin til afhendingar.


SuperMarío er langt komin og verður kláraðu von bráðar

Best er að vera svona í bústaðnum - í Weeso gallanum með fæturnar undir sér og eitthvað milli handanna - og helst sögu í ipodinum líka.

Langamýri 2011

2011-10-15T09:18:00.003Z

Langamýri 2011
Nú var vel pakkað í bílinn - enda 5 konur á ferð, allar með saumavélar og annan tilheyrandi farangur, en skemmtilegar konur láta það ekki á sig fá þó þröngt sé - það eru bara mjúkir rassar sem sátu þétt.

Hér erum við búnar að pakka í bílinn fyrir utan hjá Villu - og að leggja af stað.

Helgin var í alla staði frábær og gaman að sitja og sauma, læra eitthvað nýtt, sjá hvað aðrir eru að gera og skemmta sér saman.

Saumatuðra - undir tvinnan eða eitthvað annað

Lilja Páls fékk þessa

Berglind gerði þessa

Sigrún gerði þessa og þessa

Fyndið hvað allir voru í töskuframleiðslu þessa helgi

Les-píju taska - fyrir bók og hvítvínið

þessi passar undir mottuna og saumagræjurnar

og þetta box undir fatquarter - eða sem hirsla.

Þemað voru rauðir skór.... :-)

Myndir

2011-08-09T11:26:00.000Z

7 hlutir í einu segir systir mín. húfa, sokkar, sjal á prjónunum, gardínur á heklunálinni, púði á saumanálinni og síðast en ekki síst var verið að setja bindingu á teppi fyrir stóru systur.

Haldið ekki að það sé flott - rosalega ánægð með það

Sumar 2011

2011-08-05T11:18:00.001Z

Hér er peysa sem Bergdís María óskaði eftir - bleik peysa með rennilás, hún sá mig vera að prjóna í bústaðnum í sumar - er þetta handa mér sagði hún - ég var að prjóna ermarnar á grænu peysuna mína, nei þessi peysa er handa ömmu, hún er alltof lítil sagði þá sú stutta, viltu prjóna bleika peysu handa mér - og hvað gera ekki ömmur fyrir snúlluna sína.

Þessi er úr kambgarni - átti reyndar að vera annað munstur í berustykkinu, byrjaði á því tvisvar sinnum en mér fannst það ekki ganga upp, þannig að ég leitaði á netinu að þessu uglumunstri skrifaði það niður á eldhúspappír og setti það inn í staðinn, ég keypti síðan pallíettur fyrir augu.

Hér er síðan hitt teppið sem ég hef verið að sauma í vor og sumar - var að koma úr kvilteringu frá Við-bót, ég er mjög ánægð með það, frábær þjónusta hjá Sæu.

Askur veit að hann má ekki sofa upp í sófa - eða það held ég allavega, en uppá sófa laumar hann sér þegar enginn sér til

Ég elska matinn minn - enda er ég búin að losa mig við 20 kg síðan í desember síðastliðunum með breyttu mataræði, enginn sykur, ekkert hveiti - bara fullt af grænmeti og kjöti/fiski og góðu salati og sósu, nammi namm.

Sumarið 2008 og síðan núna

Síðan hleyp ég til að koma skrokknum í þokkalegt form og auka þolið - hér er ég að koma inn eftir að hafa skokkað upp Kaldárselsveg að Skógræktinni og til baka aftur heim eða um 7 km - undirbúningur fyrir 10 km í Rvíkurmarathoni Íslandsbanka og hér er hægt að heita á frúnna.

Framkvæmdum við bústaðinn er að ljúka - aðeins á eftir að bera á pallinn og húsið - verður það gert núna um helgina ef ekki rignir

Við fengum Guðmund bóndann á Klausturhólum til að koma og moka burtu, jafna út, og tyrfa túnblett fyrir okkur og erum við mjög ánægt með afraksturinn - einnig fengum við nokkrar birkiplöntur og 3 reynitré frá Pétri pabba hans Garðars og er verið að vökva þau þarna.

Þessar myndir eru þegar hjónakornin áttu afmæli, sonurinn bakaði súkkulaði smákökur fyrir sig og systur sína, vissi að hann fengi ekkert sætt nema hann kæmi með það sjálfur og síðan tóku þau lagið feðginin á gítarana sína - Amma heldur á textanum og raular með.

Teppið hennar Móeiðar tilbúið

2011-06-30T22:32:00.000Z

Móeiður Una var 10 ára, 10 júni og var ég búin að lofa henni teppi, hún fékk það loksins afhent í gær og var svakalega hrifinn og þakklát, fór strax að búa um og taka til í herberginu sínu.

Móu teppi að verða tilbúið

2011-05-26T22:20:00.001Z

Lúruteppið fyrir hana Móu er að verða tilbúið - á eftir að fara með það í stungu.

Verk í vinnslu

2011-05-19T21:32:00.000Z

Þetta efra er handa einni rauðhæðri snót, búin með allar blokkirnar en á eftir að sauma hornin á, uppröðunin verður önnur en á þessu fyrir neðan, ég skelli þessu nú bara upp á vegginn hjá mér meðan ég er að sauma blokkirnar.

Og þetta eru alveg sama munstur en uppröðunin er önnur

Dear Jane efnin sem ég hef fengið

2011-05-19T21:29:00.000Z

Ég þarf að draga djúpt andann áður en ég byrja að sauma úr þessum efnum en..... það verður einn góðan veðurdag

Dear Jane það eru komnir 3 pakkar af 24 í hús

Fullt af myndum

2011-05-19T21:19:00.000Z

Við Helga tókum okkur góðan sunnudag í að sauma og þetta er afraksturinn

2 snyrtibuddur

2011-04-30T21:57:00.000Z

2 snyrtibuddur runnu úr saumavélinni núna seinni partinn í dag, hrikalega auðveldar og flottar

Fékk uppskriftina hér á Modabakeshop.com

leiðbeiningarnar auðveldar og ekki skemmir fyrir að rennilásinn er falinn milli fóðurs og framhliðar.

2011-04-25T16:22:00.000Z

Það er svo gaman að sauma, núna er ég að sauma eitt af verkefnum Guðrúnar Erlu, verkefni sem hún var með á námskeiðum í apríl hér á Íslandi.

Ég komst ekki sökum þess að ég var að vinna við kosningarnar.

Þetta er lúruteppi - efnalína LoveU frá Moda og alveg skjannahvítur bakgrunnur.

Ég er síðan búin að kaupa í grunn í annað teppi alveg eins, sem ég ætla að gefa einni í afmælisgjöf í júni og þar er grunnurinn grænn, og efnalínan Lollipopp einnig frá Moda.

Það er alltaf tími fyrir prjón líka, mér gengur þokkalega með peysuna er komin upp að ermum, og byrjuð á bakstykkinu

Það er líka alltaf til garn og prjónar í bústaðnum til að grípa í borðtuskuprjón, þessar 2 urðu til núna um páskana. fallega rauðar.

Fyrst ég þurfti í Bót á Selfossi á laugardaginn, þá keypti ég efni í veggteppi, ég keypti bókina hennar Kim Diehl "Simple Graces" ég á allar hinar bækurnar hennar og núna ætla ég að æfa mig í að applikera veggteppi.

Peysa eftir Annette Danielsen

2011-03-30T18:08:00.001Z

Nú er það frumraun að prjóna eftir danskri uppskrift

peysa fyrir sjálfa mig

linkur á munstin úr bókinni "skrik naturligvis" ef ýtt er á nafn höfundar hér fyrir ofan

Skírnarkjóll

2011-03-30T17:58:00.000Z

Eitt stykki skírnarkjóll varð til núna í mars - ekkert barnabarn á leiðinni, heldur langaði mig að prjóna skírnarkjól sem væri til fyrir framtíðina, einnig prjónaði ég í fyrrasumar danska prinsateppið þannig að kjóllinn fer í sama poka til geymslu
Uppskriftina fann ég í blaði frá Hugur og Hönd síðan 1975, ég rakst upphaflega á hann á Raverly og þá prjónaðan úr kambgarni.
Ég prjónaði hann hinsvegar úr Satúrn bómullargarni - bolinn á prjóna nr 3 og munstrið á prjóna nr 3,5
Kjóllinn er prjónaður ofanfrá og niður.

Sparitrefill

2011-02-19T16:38:00.000Z

Ég keypti mér prjónadagatal Storksins um daginn, varð hrifinn af trefli sem er í þeirri bók ásamt fleiri góðum uppskriftum - keypti garn og byrjaði, og rakti upp byrjaði aftur, þannig gekk þetta þann sunnudaginn - ekki gekk munstrið upp. Ég gafst ekki upp - sendi uppskriftina á góða prjónakonu - ég hélt að ég læsi svona rangt úr skýringarmyndinni - en viti menn, uppskriftin er röng í bókinni.

En trefilinn er tilbúin og ég farin að nota hann - mjúkur og fínn.

Hyrna og sjal

2011-01-30T12:49:00.000Z

Þetta er Haurni sjal sem ég sá einhversstaðar á netflakki mínu - það var að vísu prjónað úr lopa, en ég átti mislitt sokkagarn og lét það duga - það kemur allavega mjög vel út og er passlega stórt.

Ég er alltaf að safna að mér hvernig sauma á rennilás í snyrtibuddur, þessi aðferð sem ég fann hér er auðveld og þetta er blokk sem er ca 11"x11" stór.

Meira að klárast

2011-01-23T12:42:00.000Z

Þetta kemur allt saman, ég byrjaði á þessu teppi í haust á Löngumýri og núna er ég búin að setja það saman, á afgangs panel sem ég ætla síðan að nota í miðjuna á bakinu með þessu brúna.
og síðan kemur köflótt binding utanum.

Jóladúkurinn klár eða þannig

2011-01-02T13:56:00.000Z

Loksins, ég man ekki einusinni hvenær ég byrjaði á þessum, en hann hefur verið m.a. sumarbústaðaverkefni mitt undan farin alla vega 3 ár. En semsagt útsaumnum lauk núna á aðfangadag, nú þarf ég að bridda hann og ganga frá honum. Þá verður hann tilbúin undir jólatréð næstu jól.

Teppin eru að klárast eitt af öðru

2010-11-21T13:40:00.000Z

Hér koma 2 verk sem ég hef verið með í vinnslu undanfarið, annað er Löngumýrarteppið, nú er ég að klára það - nota afgangana í bakið.

og hitt var að koma úr stungu frá Sæunni í Við-bót og það er tilbúið til afhendingar.

Löngumýrar teppið

2010-10-19T20:41:00.001Z

Hér er teppið komið á rúmið hennar

Eða teppið sem ég er að gera fyrir hana Sólrúnu Ylfu..... það verður baaaaara flott.

Saumahelgi að Löngumýri

2010-10-09T08:15:00.000Z

Það er gott að eiga rúmgóðan bíl, fyrir fjórar bútasaumskonur, samt pökkuðum við engu óþörfu.

Helga komin á fullt með ræmurnar sínar.

Langamýri í Skagafirði, falleg í haustlitunum, yndislega fallegt veður var alla helgina og það var 18° hiti þegar við fórum heim.

Helga, Villa og Þórunn komnar á kvöldvökuna.

Snyrtibuddur Sísu, og kennsla í rennilásasaum.

Þessar eru yndislegar, Margrét og Þórunn, mjög góðar vinkonur, láta eins og gömul hjón sem hafa verið giftar í tugi ára.

Verkefni mitt fimmtudag og föstudag, kemur bara vel út.

Byrjunin á óvissuverkefninu - 164 3" blokkir og síðan skástrikað 1/4" frá miðju.

Berglind var að sýna hvernig hún gerir krákustíga í vélinni, hún er mjög flink við það stúlkan sú.

Saumahelgin var yndisleg, okkur leið eins og litlum börnum sem eru úti að leika, síðan er kallað inn í mat og kaffi. Setið var við saumavélina frá kvöldmat á fimmtudegi og fram að kaffi á sunnudegi er haldið var heim á leið með nokkur verkefni hálfkláruð í fararteskinu. Síðan er það aftur að ári ekki spurning.

Langamýri hér kem ég

2010-09-30T08:40:00.000Z

Sunnudagsverkefni

2010-09-26T15:45:00.000Z

Þegar veðrið er eins vont og það hefur verið í dag þá er ekkert betra að gera en að sauma.

Hundur að verki

2010-09-25T09:44:00.000Z

Þetta er afleiðing þess að skilja Ask eftir einan heima, og ganga ekki frá prjónadótinu sínu

en hann er ósköp ljúfur og góður, þannig að ég er löngu búin að fyrirgefa honum þetta.

Lopapeysan Freyja

2010-06-17T09:24:00.000Z

Knitting Iceland gaf út þessa uppskrift á netinu, það á að prjóna hana úr einföldum lopa, en ég bætti við einbandi til að gera hana aðeins sterkari.
Ég tók stærð L ætlaði að taka XL en hætti við sem betur fer því hún er vel stór, mér gekk illa að prjóna eftir tækninni að gera aukaumferð til að síkka hana að aftan, fékk upplýsingar eftir á hvernig ég á að gera það.
Síðan er hún vel víð í hálsmálið þannig að ég gerði eina auka úrtöku í restina og bætti við 3 umferðum.
Heklaði síðan með fastahekli utan um hálsmálið í þriðjuhverju lykkju til að þrengja það meira.
Það eru 3 tölur úr kindabeinum, ég ætla síðan að bæta við einni smellu fyrir neðan.

Ræmuteppi

2010-06-11T11:55:00.000Z

Ég er búin að vera að dunda mér að sauma þetta ræmuteppi, hönnun eftir Guðrúnu Erlu, notaði batikefni og dökk kremaðan millilit.

Nú er aðeins eftir að kaupa í bindingu og setja síðan teppið í ástungu.

Hvítasunnuhelgi

2010-05-24T10:23:00.000Z

Við erum búin að eiga rólega hvítasunnuhelgi í bústaðnum, allt of rólega ef kannski.
Það eru venjulega engin verkefni sem við tökum með okkur í bústaðinn, nema ef brýn nauðsyn ber til, eins og að bera á pall eða hús, eða bera áburð á landið, það var það eina sem við gerðum þessa helgi, bárum áburð á restina af hektaranum þar sem við vorum ekki með nægan áburð síðast þegar við komum.
Við fórum einnig í BYKO að kanna pallaefni - því okkur (mig) langar til að klæða af pallinn mynda smá skjólvegg til að geta nú legið í sólinni eða setið útivið og borðað og sleppa við norðan næðinginn.
Handavinnan sem ég tók með hingað var svuntan sem ég saumaði um síðustu helgi, og er ég búin að sitja við og kappmella í kring um munstrið, ég ætlaði að gera þetta í saumavélinni, í fyrstalagi átti ég ekki nógu fallegan tvinna og í öðru lagi þarf ég góða æfingu áður en ég hefst handa í vélinni. Þannig að ég er komin með auma fingurgóma, síðan hef ég verið að prjóna úr Kauni garninu, ég er alltaf með sömu hespuna, byrja á einhverju sem ég er ekki nógu ánægð með og rek upp, núna er það trefill með auðveldu munstri, garnið er það dökkt á köflum að mér finnst erfitt að sjá hvað ég hef verið að prjóna.
Gróðurinn hefur tekið vel við sér hér í sveitinni, aspirnar langt komnar á veg með laufgun og sama með birkið. Við þurfum að taka með okkur sláttuvélina og sláttuorfið hingað næst til að slá blettinn.
Þangað til næst - hafið það gott.

Grundarfjarðarferð

2010-05-22T21:40:00.004Z

Um síðustu helgi fórum við bútasaumsvinkonurnar til Grundarfjarðar, til hvers, jú til að eiga saman í fyrsta skipti allar eina helgi til sauma.

Við gistum í verbúðaríbúðum, saumuðum í einni þeirra og gistum síðan í tveimur.

Við vorum 7 alls, 5 að sunnan og 2 innfæddar.

Þær voru búnar að ákveða að sauma prjónaveski, en þar sem ég kom það seint inn í hópinn þá og ég var búin að kaupa pakkningu með svuntu þannig að ég hélt mig við hana, síðan byrjaði ég á ræmuteppi og komst ansi langt með það.

Var þetta hin besta skemmtun hjá okkur. Það voru þreyttar konur sem komu heim í Hafnarfjörðinn seint á sunnudagskvöld

Bogateppið

2010-04-25T14:55:00.004Z

Loksins hef ég lokið við að stinga og setja bindinguna á bogateppið hennar Guðnýjar Maríu. Komin tími til þar sem hún fær íbúðina sína afhenta 1.maí og verður þetta teppi á hjónarúminu þeirra.

Prjónaskokkur á Bergdísi

2010-04-17T14:28:00.004Z

Nú er ég voða montin búin með skokk á skvísuna litlu og hún er svakalega fín í honum

Febrúar 2010

2010-02-28T09:57:00.004Z

Snjórinn sem við erum búin að vera að bíða eftir síðan fyrir jól, kom síðastliðinn fimmtudag. Ég tók mér 3 daga frí um miðjan mánuðinn aðeins til að slaka á, fékk síðan vægast sagt lélega niðurstöðu úr blóðþrýstingsmælingu þegar ég mætti í vinnu aftur 193/118 og var sett á aukalyf sem ég þarf síðan að taka með áfram, á nú samt að láta fylgjast með mér.

Dísirnar báðar voru hjá okkur í heila viku, áður en þær fluttu sig inn í Rvík, það var ekki leiðinlegt að hafa litlu Dís hjá okkur.

ég er búin að vera að prjóna lopapeysuna mína,

en hún gengur að vísu mjög hægt,

síðan er ég að gera löber einn af þeim sem keypti í USA ferðinni í haust

og er komin þó nokkuð af stað með hann

Laugardagur 6.feb 2010 Nýtt ár ný markmið

2010-02-06T07:38:00.004Z

Hef ekki skrifað síðan á síðasta ári. Ekki mikil framför í þeim efnum.

Það sem ég hef áokað í handavinnunni er dúkkupoki og peysa og húfa fyrir dúkkuna hennar Bergdísar.

Einnig prjónaði ég 2 kvenfélagshúfur handa ungabörnum, mjög gaman að prjóna þessar húfur og kom kambgarnið mér virkilega á óvart, hef ekki prjónað úr því fyrr, á gamalt sjal sem mér var gefið fyrir mörgum árum og virðist kambgarnið í því vera mikið grófara, einhver mikil breyting hefur orðið á framleiðslunni til góðs á því.

Mér hefur lítið orðið ágengt með lopapeysuna mína, en er samt farinn að prjóna ermarnar, ætli hún verði ekki tilbúin fyrir vorið.

Í bútasaumnum hefur mér tekist að klára bogateppið þ.e. að sauma framhliðina og nú er aðeins eftir að setja það saman með baki og vatti - er það verkefni dagins í dag, því það er saumadagur hjá okkur Spottakonunum í Hafnarfirði.

Ég ætla einnig að taka með mér löberinn svarta með 8 blaða rósinni og kvilta hann, og skera niður í annan Kaffe Fasset löber sem ég keypti í USA ferðinni í haust.

Meira síðar

Eldlilju Askur

2009-12-13T12:50:00.004Z

Loksins er hann okkar, hann Askur, fæddur 11.10.09.

Áhuginn byrjar snemma

2009-11-29T11:48:00.000Z

Prjóna peysu gúkku.

Saumapoki

2009-11-26T19:44:00.000Z

Við saumavinkonur hittumst síðastliðin laugardag og hristum fram úr erminni svo sem einu stykki saumapoka - við hristum þetta að vísu ekki fram úr erminni heldur tók þetta okkur allan daginn að koma þessu þokkalega frá okkur. Uppskriftin var nokkuð snúin.

Nýjasti fjölskyldumeðlimurinn

2009-11-24T19:19:00.005Z

Má ég kynna Ask - verðandi fjölskyldumeðlim okkar frá og með miðjum desember.
Hann fékk að koma í fyrstu aðlögun til okkar síðastliðin laugardag og gekk mjög vel.

Hér er hann með henni mömmu sinni henni Eldlilju Anastasíu.

Ferðasagan

2009-10-02T17:49:00.049Z

Jæja þá erum við komnar heim og ánægðar með ferðina.

Ferðatöskurnar voru léttar við brottför, var allavega léttari hjá annari okkar. Við hittum Möggu og Vigdísi í Flugstöðinni, þær voru samferða okkur út til Minneapolis og gistum við á sama hóteli fyrstu nóttina. Þegar við vorum búnar að fá bílinn - þægilegan Nissan bíl, sem var með númeraplötum frá Flórida - og koma Garmintækinu í gang, ókum við sem leið lá að hótelinu. Við ætluðum okkur að fara síðan strax í Mall of America og fá okkur að snæða, en hættum við það og ókum sem leið lá með Möggu og Vigdísi á nálægan veitingastað. Við vorum einfaldlega of þreyttar.

Dagur 1.

Við vorum vaknaðar mjög snemma eins og við ætluðum okkur, vorum farnar af stað kl. 5.30 áleiðis til Omaha í Nebraska.
Garmurinn (eða kellingin) valdi fljótustu leiðina, ekki hraðbrautina, við fórum í stað í myrkrinu og sáum birta af morgni og við vorum búnar að ákveða að borða morgunmat á einhverjum góðum stað á leiðnni.

Við vorum við komnar á fyrsta áfangastað um kl. 13 í fyrstu bútasaumsbúðina Country Sampler, mjög góð búð með mikið úr val af sniðum og efnum. Keypti ég bæði efni og snið í teppi þar ásamt stórri reglustiku, ég hélt svo fast um það sem ég var að versla að þegar ég lagði dótið frá mér á búðarborðið fékk ég þvílíkan krampa í upphaldlegginn að ég var lengi að jafna mig.

Bútasaumssafnið í Lincoln í Nebraska kom mjög á óvart, safn eingöngu með bútasaum og rannsóknir á þeim, það sem kom einnig á óvart er nafn konunar sem ásamt manni sínum gáfu öll teppin til safnsins er Ardis... skyldi hún vera af íslenskum ættum?

Hótelið sem við vorum búnar að bóka næstu 2 nætur var í Maryville, Missouri, við keyrðum um sveitavegi áleiðis að bænum og fórum skemmtilega leið sem var hálfgerður rússibani - upp og niður og bein leið, eins langt og við sáum, þetta var allavega mjög fyndið.
Hótelið Super 8 var allt í lagi, fyrst var okkur úthlutað reykingarherbergi, en vorum fljótar að skipta eins gott. Fengum við okkur að borða á veitingastað við hótelið. Og síðan var farið snemma í háttinn við ætluðum okkur að horfa á Emmy verðlaunaafhendinguna en sofnuðum báðar yfir henni.

Dagur 2.

Rigningarspá, við vorum lagðar snemma af stað eða fyrir kl 8, til að ná rúnti dagins, sem lá leið frá Maryvill til Lee Summit í Missouri, heimsókn í bútasaumsverslunina Quilters Stations, þar vorum við komnar fyrir opnun, en okkur samt hleypt inn í verslunina. Skemmitleg búð með mikið úrval bæði af efnum, bókum, munstrum og tilbúnum "kit" Sá ég "teppið" sem ég féll fyrir og ætla mér að sauma þegar ég hef klárað það sem fyrir liggur.

Héldum við síðan sem á leið til baka aftur áleiðis upp til Maryville, og þá framhjá Kansas City þar sem við lentum í þvílíkri rigningu, þrumum og eldingum, tók það dálítið á að keyra í rigningunni gegn um stór umferðarmannvirki, en Garminkellingin stóð sig vel og bílstjórinn ekki síður.
Næsta búð var Harper´s í Overland Park í Kansas, lítil búð með Husqvarnahorn, ágætis efnisúrval þar á meðal töskusnið, einnig var þar námskeið í gangi fyrir byrjendur í innra herbergi búðarinar.

Næst fórum við til Parkville, en það er lítið þorp eða bær, þar var verslunin sem við ætluðum að heimsækja en hún var lokuð, en það er nokkuð algengt að sérverslanir séu lokaðar á mánudögum.
Leiðin lá síðan í Country Expression Quilt Shoppe, staðsetning á þeirri verslun kom okkur á óvart þar sem hún var eiginlega við hraðbrautina, en þegar inn var komið þá voru margir gullmolar.

Við versluðum smávegis í hverri verslun og alltaf sögðum við, okkur vantar ekki neitt, en við keyptum samt alltaf eitthvað í poka.

Við keyrðum síðan áleiðis aftur á hótelið. Við hlið hótelsins var Super Wallmart og þar gerðum við aldeilis góð kaup á ýmsum hlutum sem okkur "bráðvantaði"

Dagur 3

Þá vorum við á leið til Hutcinson í MN langur akstur, smávegis af roadwork á leiðinni og við viltumst af leið, en Garminkellingin fann rétta stefnu fyrir okkur, Helga vildi t.d. elta einn bíl sagði hann fara rétta leið, en ég hélt nú ekki. Við fengum smávegis útsýnistúr í staðin.

Við stoppuðum í bæ sem heitir Elk Horn, og fórum inn á upplýsingamiðstöð (ég þurfti að pissa) en þetta er Dansk-Amerískur bær, og þar meðan ég var á salerninu fann Helga kransakökuform sem ég átti að kaupa fyrir Ásdísi, - sem var eins gott því það var hvergi til neinsstaðar annarsstaðar.
Auðvitað var einnig bútasaumsbúð í þessum bæ, skrítið, lítil búð með ágætis efnisúrval.

Næst var litla skemmtilega húsið í Adel, við villtumst fyrst inn í
búðina við hliðina sem var gjafavöruverslun, en þessi var voða
krúttleg, og eitthvað kom þaðan út í poka.

Síðan var það bærinn Hutchinson MN, þar ætluðum við í Main Street Cotton Shop, en komumst að því okkur til skelfingar að búðin var lokuð, og það átti að vera lokaútsala þar 2 dögum síðar, og nú voru góð ráð dýr. En við gerðum bara nýtt plan.

Í Hutchinson fengum við okkur að borða en leit að góðum veitingastað bar ekki árangur, þannig að við fórum á Taco Bell og fórum heim á hótel með matinn,
Morgunin eftir fórum við snemma af stað til St. Cloud, byrjuðum samt að fara til Albertville í outletið, þar hittum við Helgu og Vigdísi aftur, og kláruðum allt sem til var þar.
Við fórum með þeim í Grubers quilt Shop, þar gátum við verslað heilan helling, ég féll fyrir Kaffe Fassett löber, langaði í meira, einnig keypti ég í teppi sem ég var búin að ákveða að kaupa í áður en ég fór að heiman, og fleira smálegt rataði í pokana okkar.

Á leiðinni heim þennan dag hittumst við á veitingarstað og héldum upp á 50 ára afmæli Möggu, fórum á Amerískan stað, og Magga fékk meira að segja afmælissöng og ís í desert eins og góðu afmælisbarni sæmir.
Það var vel lestaður bíll sem fór heim að hóteli í St. Cloud.

Dagur 4

Við ákváðum að breyta dagskránni aðeins og fórum til baka í Main Street Cotton Shop á lokaútsöluna, við mættum allar fjórar, ásamt fullt af konum í biðröð fyrir utan verslunina þegar hún opnaði kl. 9 - þetta var svoldið skondið, því konurnar sem voru á undan okkur í röðinni þær stoppuðu í forstofunni og byrjuðu að hreinsa út skreytingarnar úr hillunum og ofan af þeim líka, saumuð teppi af veggjum og fleira, við eða allavega ég var mjög hissa og rölti bara um - keypti mér eina tuðru með merki búðarinnar og saumasvuntur.

Áfram heldum við síðan til Albertville að outletinu, og síðan í næstu bútasaumverslun, Quilters Treasure þar sem við fengum að sjá nýjustu verk Guðrúnar Erlu, og einnig fékk ég þar panelefnið sem mig vantaði í barnateppið sem ég var búin að kaupa í daginn áður.
Leiðin lá síðan aftur til Minneapolisborgar og nú á nýtt hótel, mjög gott og á þægilegum stað.

Við fengum hins vegar hláturskast þegar við litum aftur í bílinn og hvernig áttum við að koma þessu inn á hótelið, jú með pikkaló kerrunni.
Við prófuðum að pakka ofaní töskurnar fyrir heimferð sjá hvort við gætum troðið meiru og komust að því að svo var, en við lofuðum hvor annari að versla ekki meira, en það loforð var svikið strax og við komum inn í Mall of America.

Enda var veglegur innkaupalisti meðferðis sem þurfti að versla þar á hinum ýmsu stöðum, og síðan tók við leit að stærri tösku undir allt saman, og koma töskunni minni fyrir í geymslu á góðum stað þannig að hún gæti komið til Íslands með einhverri ferð, kannski innkaupalisti verði sendur til Alison og hún sendi síðan góssið heim í töskunni góðu.

Þessi ferð verður í minnum höfð, og við erum báðar tilbúnar að endurtaka leikin aftur síðar, og þá með eiginmennina meðferðis - því þá er hægt að versla meira .....hehe getum fyllt 4 töskur í stað 2ja.

Takk fyrir frábæra og vel skipulagða viku Helga.

Við ókum 2.905 km eða 1800 mílur á þessari viku okkar sem er vel að verki staðið.

Ferðin til USA í sept

2009-09-02T19:13:00.000Z

Ég og Helga Einars samstarfskona mín í bankanum erum að fara saman til USA 19.sept og ætlum að vera í viku.

Tilkoma þessarar ferðar er þannig að síðastliðin vetur, sáum við ferð sem var í boði, QuiltersMagazine þ.e.rútuferð milli 4 fylkja, Iowa, Missouri, Kansas og Nebraska.
Við keyptum okkur flugferðina í febrúar á vildarpunktum, hittumst við síðan til að melda okkur í þessa ágætu rútuferð "shophop", hringdum til USA, en náðum við aldrei sambandi við þann sem átti að taka við þáttöku.
Helga gafst ekki upp og fékk uppgefin tölvupóst hjá einhverjum tengilið og þá kom það í ljós að ferðinni hafði verið aflýst, aðal sponsorinn hafði hætt við.
Nú voru góð ráð dýr, við komnar með farseðil til Minneapolis og hvað áttum við að gera annað en að gera bara okkar eigin ferð úr öllu saman.

Og það er nákvæmlega það sem við ætlum að gera
.
Við fljúgum út laugardaginn 19.sept til Minneapolis, fundum okkur ódýrt hótel.

Við ætlum aðeins að kíkja í Mall of America þegar við komum út, aðeins að taka út búðirnar og sjá hvað er í boði, fá okkur að borða og koma okkur síðan á hótelið.
Við vöknum sjálfsagt á íslenskum tíma kl. 7, en þá er klukkan aðeins 2 eftir miðnætti að þeirra tíma, við reiknum með að keyra snemma af stað því við eigum langa ökuferð fyrir höndum.

Sunnudagur 20.sept.

Akstur frá Bloomington, MN til Omaha í Nebraska.
þar ætlum við að versla í The Country Sampler og síðan skoða

International Quilt Study sem er bútasaumssafn, því menningarlegar ætlum við okkur að vera einnig.

Við ætlum að láta þetta duga þennan sunnudag því við keyrslan hefur örugglega verið stíf og gistum í bæ sem heitir Maryville, MO á hóteli Super 8 Maryville við ætlum að gista á þessu hóteli í 2 nætur
Akstur þennan legg tekur 9 tíma og er 550 mílur

Mánudagur 21. sept.

þá er ætlunin að fara í:
Quilters Station, í Lees Summit, Missouri
Harper´s Fabric & Quilt Co í Overland Park, Kansas
Country Expression Quilt Shoppe sem er "home of Tula Pink"og NW Missouri largest Quilt Shoppe.
keyrslan þennan dag er áætluð 5 tímar og 282 mílur

Þriðjudaginn 22.sept

Síðan er ætlunin að vappa um þennan bæ, því þetta er svona ekta "húsið á sléttunni" svæði sem gaman er að rölta um, síðan er keyrt í rólegheitum upp til Hutchinson í MN
þessi dagur á að taka í keyrslu 8 tíma og 500 mílur

Hótel í Hutchinson verður Best Western Victorian Inn,

Miðvikudagur 23.sept

Þá höfum við færst nær Minneapolis aftur, erum rétt fyrir vestan borgina. Þennan dag ætlum við að fara í:

Main Street Cotton Shop sem er búin sem Helga þekkir best.
Það á að versla meira en búta, við ætlum að dressa okkur upp í outletinu í Albertville, Albertville Premium Outlets,
Næst er það bútasaumverslunin Grubers Quilt Shop sem vinsæl verslun.

Svo er haldið á næsta hótel sem er Country Inn & Suites í Saint Cloud, MN
þessi dagur er stuttur í akstri aðeins 2 tímar og 100 mílur

síðan erum komin að síðustu dögunum eða

Fimmtudegi 24. Föstudegi 25, og Laugardegi 26 sept

þá ætlum við að gista í Best Western Regency Plaza Hotel
við ætlum út frá þessu hótel m.a. að fara á fleiri staði eins og:

Eagle Creek Quilt Shop
Quilted Treasures
Calico Hutch
Jo-Ann Superstore
Michaels
Marathon sports
Rosebud´s Cottage
Mall of America
WalMart
Target
og enda síðan í Sam´s Club ef við eigum þ.a.s. einhverja USD eftir til að kaupa jólamatinn.

Ætli við verðum ekki svo þreyttar þegar við komum heim snemma sunnudagsmorgunin 27.sep að við þurfum að vera í fríi einnig næstu daga á eftir hver veit.

Sumarhandavinnan

2009-08-20T21:29:00.000Z

Sumarið 2009

Prinsateppið er klárað, langar að prjóna skírnarkjól til að eiga fyrir mig í stíl við teppið. Er búin að finna munstur. Byrja á því þegar tími gefst til.

Ég prjónaði einnig leikskólapeysu fyrir Bergdísi Maríu - þurfti reyndar að taka hana upp aftur í hálsmálinu og þrengja það betur.Ég hef einnig aðeins verið að taka í jóladúkinn, verð örugglega búin að klára hann fyrir næstu jól.

Núna í sumar tókum við rafmagn inn í bústaðinn, og þvílíkur munur. Núna í síðsumarfríinu mínu tók ég saumavélina mína með og hef setið hér við og saumað tuðru, og snyrtibuddu.

Það er ekki amalegt að hafa góða aðstöðu í bústaðnum fyrir handavinnuna og eins að manni líði eins vel og mér hefur liðið hér í öllum gróðrinum og fuglasöngnum.Annars erum við búin að vera dugleg að ferðast í sumar, keyptum okkur tjaldvagn í byrjun sumars, fórum hring um Vestfirðina í lok júni. Oddfellow útilegan var í StóruMörk og jeppaferð inn í Þórsmörk. Síðan um verslunarmannahelgina var aftur haldið til Ísafjarðar í Grjótaútilegu, þar sem Ingvar Ágúst og fleiri höfðu hjólað til Ísafjarðar

Núna í september förum við Helga Einars til USA í bútasaumsferð og verður pottþétt mikið gaman og eitthvað sjálfsagt verslað.

Flóafárinu lokið

2009-06-04T17:31:00.000Z

Nú er Flóafárinu loksins lokið og tilbúið. Það er búið að vera lengi samanbrotið hálfkvilterað, en ég tók mig til í morgun og kviltaði krákustíga í saumavélinni og tókst nokkuð vel til, en æfingin skapar meistarann.

Danska prinsateppið í vinnslu

2009-06-04T17:24:00.000Z

Nú er Danska prinsateppið langt komið og sér fyrir endan á því núna fljótlega, það er búið að taka mig langan tíma að komast í gegn um það, byrja og rekja upp, og byrja aftur. Síðan er ég að gera ysta kantinn núna og tekur hann dágóðan tíma. Hér er mynd sem tekin var í síðustu viku í bústaðnum. Ekki góð en samt.

Flóafárið "næstum" tilbúið

2009-04-15T14:36:00.000Z

Jæja þá er maður búin að setja kant og spreyja saman með vatt og baki. Nú er næsta skref að vélkvilta og "áður en maður veit af" er teppið tilbúið.

Flóafárið

2009-04-02T20:57:00.000Z

Þá fer Flóafárinu að ljúka, ég kláraði að setja það saman áðan. Ætla mér að setja á það kannt og bindingu í sama lit. Efnið í þetta teppi er frá Quiltbúðinni, 2,5" ræmur, 2 rúllur með 46 ræmum í. Efnalínan er frá Bernatex, og heitir City Girl Wavy Stripe.

Óvissuhelgi

2009-03-15T19:39:00.000Z

Það var sannanlega óvissusaumahelgi sem við stelpurnar fórum í síðasta föstudagskvöld og laugardag.
Guðrún Erla kom til landsins og var með saumahelgi í Flóa. Það voru amk 70 konur í heildina þar að sauma bæði föstudagskvöld og laugardag, sumar aðeins annan daginn.
Ég skráði mig á bæði námskeiðin.
Föstudagskvöld var saumaður löber beint á bak og vatt.

Það gekk á með óveðri þetta föstudagskvöld, Hellisheiði lokaði og bauð ég vinkonu Helgu Einars gistingu í bústaðnum gistingu og keyrði hún okkur þangað. Var Maggi elskulegur komin í bústaðin og búin að hita húsið upp. Sást húsið ekki frá veginum og var þvílík hríð að ekki sá úr augum á leiðinni. Voru nokkrar konur sem gistu í bústöðum við Hveragerði og voru þær 2 tíma á leið í bústaðin um kvöldið en 20 mín á leið til baka morgunin eftir.
Laugardagsverkefnið var óvissuverkefni, fengum við að vita hvernig efni við ættum að mæta með og saumuðum við fram til kl. 16, ég rétt komst að vísbendingu 6 af 10 þannig að teppið verður ekki sýnt fyrr en því verður lokið.

Mig langar að gera svo margt núna. Ég verð í fríi næstu helgi, ætla að taka mér 4 aukadaga í frí og verðum við í bústaðnum frá fimmtudegi, og verða prjónarnir teknir með. Langar mig að prófa þetta verkefni hér konunglega danska prinsateppið.
Annars þarf ég að vera dugleg að slappa af, búið að vera mikið álag undanfarið.

Afrakstur vikunar

2009-02-14T18:56:00.001Z

Fékk senda uppskrift af poka frá Ingu frænku um daginn, og einnig sá ég á netinu uppskrift af samskonar poka
http://www.thestitchingroom.blogspot.com/2007/10/thread-holder-pattern.html
Mig langaði að prófa þetta. Og hér er útkoman.
Hér er einnig staðan á lopapeysunni í dag, ég á eftir að klippa niður fyrir heppingunni og prjóna kragann

Spottarnir hittumst í gær

2009-02-08T09:45:00.000Z

Það er komið nafn á bútaklúbbinn okkar.
Hann fékk nafnið Spottarnir.
Við hittumst í gær og ákváðum m.a. að setja út bloggsíðu með myndum af verkum okkar.
Mér gekk ágætlega að sauma í verkefninu mínu þetta þokast áfram.

Þetta eru júli blokkirnar tilbúnar, og hér fyrir neðan er ég langt komin með ágúst blokkirnar

~
Mér gengur þokkanlega með lopapeysuna, ermarnar komnar á bolinn og nú hefst lokavinnan við hana.

Lopapeysa

2009-02-01T11:12:00.000Z

Ég hélt að ég ætti alls ekki eftir að prjóna á mig lopapeysu.
En svo bregðast krosstré sem önnur tré.
Ég keypti garn í peysu á föstudaginn og gengur bara mjög vel.
Með þessu verð ég líklega búin með hana um næstu helgi.
Þetta er munstur úr Ístex bók - og hún heitir Órói, prjónuð úr Álafoss hespulopa með prjónum nr. 6

Sumarbústaðaferð í þorrabyrjun

2009-01-28T07:31:00.000Z

Handavinnutaskan var tekin með í bústaðinn að venju. Í henni að þessu sinni var jóladúkurinn sem þokast aðeins áfram, enda hefur hann aðallega verið saumaður í bústaðnum og verður fjótlega tilbúin þ.e.a.s. ef ég ákveð ekki að hafa hann ekki útsaumaðann allan hringinn.

Og síðan er það prjónavestið, vel gengur að prjóna það en það er seinlegt þar sem garnið sem ég nota er mjög fínt og vestið prjónað á prjóna nr. 3 en það þokast.

Handavinnuklúbbur bankans.

2009-01-22T07:34:00.000Z

Fór í gærkveldi miðvikudag í handavinnuklúbb bankans, við vorum mættar þarna 15 konur, nokkrar nýjar og sátum flestar og prjónuðum. Þetta er alltaf hin bestu kvöld og eigum við saman gott spjall. Næsta kvöld verður 18.feb.

Prjónavesti

2009-01-17T08:56:00.000Z

Ég varð svo hrifinn af þessu vesti sem er í prjónablaði Tinnu nr. 40, að ég ákvað að kaupa garn í það og varð fyrir valinu Rowan merion ull. Ég byrjaði um jólin á þessu og hef tekið skurk í þessu af og til, þangað til í síðustu viku, þá var ég komin að úrtöku fyrir handvegi, og komst ég alls ekki í gegn um uppskriftina þrátt fyrir að hún væri á íslensku. Ég vissi af annari konu sem var í sömu vandræðum og tók hana nokkurn tíma að komast í gegn um þetta. Síðan fórum við Maggi á sunnudaginn síðasta í Hveragerði til Láru mákonu og er hún prjónakona mikil, lét ég hana hafa blaðið og ég byrjaði að prjóna - og aftur urðum við strand.....arrrg af hverju er verið að setja uppskriftir í blöðin sem eru ekki prófaðar áður. Ég hringdi síðan í þessa konu sem ég vissi um og bað hana að leiðbeina mér og hafði hún farið í heildsöluna og fengið leiðréttingu á uppskriftinni. Ég hitti síðan eigenda verslunarinnar í gær og sagði ég henni af þessum hremmingum mínum og sagði hún þá að það væri búið að leiðrétta uppskriftina í nýrri prentun af blaðinu en aumingja konurnar sem eru nú þegar að prjóna þetta vesti úr fyrri upplagi af blaðinu og eru strand. Þær hugsa kannski eins og ég, nota garnið í eitthvað annað. En nú er ég að gera aðra tilraun með réttri uppskrift og vonandi hætti ég ekki endanlega við.

Verkefni í vinnslu

2009-01-11T09:26:00.000Z

Heklað milliverk í sængurverk - fyrri hlutinn heklaður af föðurömmu (veit ekki betur)

Efni í teppið fyrir Guðný Maríu.

Þessi lúruteppi bíða eftir að kviltast í saumavélinni

Íslenska rósin,aðeins á eftir að kvilta hann

Jóladúkurinn staðan í des 2008

Svart/hvíti draumurinn sem ég byrjaði á í sept 2008 á Saumahelgi Quiltbúðarinnar Löngumýri

Sunnudagur 11.jan 2009

2009-01-11T09:12:00.000Z

Þetta setti ég á bloggið mitt - orverpið um síðustu helgi m.a. þetta er það sem ég hef verið að gera í handavinnu og það sem ég á eftir að klára á næstunni.

"Árið byrjar með prjónaskap, ég tók upp prjónana í desember, gerði ég mér fyrst trefil úr mohairgarni.

Síðan tók við léttlopakjóll á dótturina, sem hún óskaði eftir, við tengdó sameinuðust að prjóna hann og svo var var það peysa á Bergdísi, ég tók ástfóstri við garnið úr Storkinum þ.e. Kaffe Fasset garnið í gamla daga, ég prjónaði svoldið úr því þá, og ákvað að kaupa aftur og er sko alls ekki svikin af því, þvílíkur gæðamunur enda kostar það "aðeins meira" en er alveg þess virði.

Núna er ég að prjóna á mig lopavesti úr léttlopa.

Síðan er eitt af markmiðunum ársins að kaupa ekki í neitt nýtt nema að vera búin að klára eitthvað sem ég hef byrjað á fyrst....... það er eitt og annað til óklárað í handavinnuherberginu."

Laugardagur 10.jan 2009

2009-01-11T07:48:00.000Z

Í dag var saumadagur okkar í Fiskistofuhúsinu í Hafnarfirði, vorum við þrjár, ég , Þórunn og Sigga. Ég hef það að markmiði að klára þessi verkefni sem ég er byrjuð á núna er það Virkuverkefni síðan 2006 - ég er búin að sauma helminginn af blokkunum sem eru saumaðar 2 stk af hverri og er önnur þeirra notuð í bakið. En þessa kláraði ég í dag og byrjaði á 2 öðrum blokkum, þær eru misjafnar eins og þær eru margar blokkirnar en verða mjög fallegt teppi þegar þessu verður lokið.

Handavinnu Fríða bloggar hér

2009-01-10T09:22:00.000Z

Ég ætla að nota þetta blogg eingöngu undir handavinnuna mína, eins og flestir vita þá hef ég alltaf eitthvað á milli handana annað hvort bútasaum, kvilt, prjóna, eða krosssaum.
Hér ætla ég að halda saman þessu hugðarefni mínu

Handavinnu Fríða bloggar

2009-01-10T09:12:00.000Z

Þetta blogg verður eingöngu notað undir afrekstur handavinnunnar. Eins og þeir sem mig þekkja verð ég stöðugt og alltaf hreint að hafa eitthvað milli handana.